d'spezi
 Home | Sponsoren | Sitemap | Impressum | Links Seite drucken
  -> Anlässe / Bummel 2009

Mir hän uns am Badische Bahnhof am 09:45 troffe. Vo Afang a isch klar gsi, dass es noch Stuttgart goht, mit em Zyl Cannstatter Wasen. E super Volksfescht wie mir bald hän dörfe feschtschtelle. Bevor de Zug abgfahre isch hän mir zur Schtärkig e Kaffi gno.

Kurz druf isch de Zug scho mit uns noch Stuttgart los gfahre.

In Stuttgart hän mir den im Hotel Espenlaub unseri "Luxuszimmer" bezoge. Zum e chli schlofe hets alle glängt.

Noch em Zimmer bezie und ibuffe, isch es ab in d Stadt gange.

De Hunger isch gross gsi und so hän mir noch längerem sueche e Schuppe gfunde wo alle zum Ässe und tringge passt het.

Früsch gschtergt sin mir uf e "Cannstatter Wasen". Mir sin alli gschpannt gsi was uns erwartet.

Bier hets gha in Hülle und Fülle, für alli Schwaben und sogar au für d'Schwizer wo derbi gsi sin.

Bier tringge het Hunger gä und so hän mir uns uf e Wäg zum Zält vo de Sonja Renz gmacht. Dört het uns de Roman d Plätz für de Obe reserviert. Roman das hesch sehr sehr guet gmacht. Vo alle beschte Dangg em Organisator.

Zwüschedure sin mir immer wieder e Zält witter. Au unterwägs hets immer wieder schöni Sache zum beschtune gha.......

E paar vo uns hän de erschti Täil vom Samschtigobe vor e re griechische Bäiz verbrocht bis da Lade drogge gleggt gsi isch.........Smiley

Treffpunkt Schatten........

Am Schluss hän sich die mäischte im Rotliechtmilieu wieder troffe. E paar vo uns hän gscharrt wie verruggt und die andere hän entwäder e Bierli drungge oder sich vo de Husherrin e Fierig durs Etablisement gönnt.... Smiley

De bescht Uftritt het aber scho unser "Schatte-Hanis" gha. Dä het während em ganze Bummel gschtrotzt wie e junge Schtier. Wos aber druf a cho wär, het är es Päuseli iglegt. De Häiwäg het är aber gschlosse mit de ganze Truppe aträtte.

E Superusflug vor unserem 10-Johrjubiläum. E tolle Bummel bi genialem Wätter für alli wo derbi gis sin. Wär gfählt het, isch sälber schuld gsi!

WEB-Design COMASYS Donnerstag, 28. März 24 / Copyright © d'Spezi, alle Rechte vorbehalten

Valid XHTML 1.0 Transitional